...a proposito di gatti

'A gatta d' 'o palazzo

Trase p' 'a porta,
pè nu fenestiello,
pè 'na fenesta, si t' 'a scuorde aperta,
quanno meno t' 'aspiette.

Pè coppe 'e titte,
da 'na loggia a n'ata,
se ruciulèa pè dint' 'a cemmenera.
E manco te n' adduone
quann'è trasuta:
pè copp' 'o curnicione
ploffete!, int' 'o balcone,
e fa culazione dint' 'a cucina toja.

E' 'a gatta d' 'o palazzo.
Padrone nun ne tene.
Nunn' è ca 'a vonno male,
ma essa 'o sape
che manco 'a vonno bene.

Te guarda cu ddoje uocchie speretate:
lèsa.
N'ha avute scarpe appriesso e ssecutate.
E' mariola!
Ma 'a povera bestiella, c'adda fa?
E' mariola pecchè vo' mangià.

E' mariola...
chest' 'o dice 'a ggente;
ma 'i nun ce credo, pecchè, tiene mente:
tu lassa int' 'a cucina,
che ssaccio...
nu saciccio.
Làsselo arravugliato
dint' 'a 'na bella carta 'e mille lire.
Tuorne 'a matina:
'a mille lire 'a truove, che te crire?
'Nzevata, ma sta llà.

(Eduardo De Filippo - 1946)

Spero che sia comprensibile per i non... "madrelingua" ;-)